Elorri Aldapak 78 eta 50 galdu zuen Bosteko Irauliren aurka bigarren faseko lehen partidan. Bigarren mailako bi talderik onenak aritu ziren elkarren aurka larunbatean eta alegiarrek ezin izan zuten euren mailarik onena eman. Donostiarrek maila handiko jokalari pare batekin min egiteko aukera izan zuten eta markagailuan hasieratik zabaldu zuten tartea. Lehen laurdena 29 eta 20 amaitu zen eta atsedenaldi luzera 48 eta 29 iritsi ziren. Alegiarrak faltekin ere azkar kargatu ziren eta horrek ere baldintzatu zuen neurri batean partida. Azken bi laurdenetan partidaren joera ez zen aldatu eta azkenerako, 78 eta 50 amaitu zen neurketa.

Larunbatean bigarren jardunaldiko neurketa izango dute alegiarrek etxean 16:15ean. Mondragon Unibertsitatea taldearen aurka ariko dira. Alegiarrak bigarrenak dira sailkapenean eta aurkaria laugarren dago. Elorri Aldapakoek bazekiten bigarren fase honetan aurkarien mailak gora egingo zuela eta larunbateko partidari begira, ahalik eta lehiakorrenak izatea eta beraien jokoa eginez partida irabaztea izango dira helburuak. Hori lortzeko, ezinbestekoa izango da zaleen babesa eta horrenbestean, zaleei partidara hurbiltzeko gonbitea luzatzen zaie taldetik. Ohi bezala, hiruko jokoa izango da atsedenaldian.

Hiruko jokoa

Gogoan izan, etxean jokatzen dituen partidetan, Elorri Aldapak jolas bat antolatzen duela atsedenaldian. Ikusleek izena eman dezakete eta hiruko bat botatzeko zozketan sartzen dira. Zozketan egokitzen den pertsonak jaurtiketa sartzen badu, Isastegi sagardotegiko produktu sorta eta pilatutako zakua irabazten ditu. Sartzen ez badu, Isastegiko sagardotegiko produktu sorta. Beraz, taldetik zaleak partida ikustera eta jokoan parte hartzera animatu nahi dira.

Elorri Aldapak lehen faseko azken partida jokatuko du larunbatean 16;30ean Eibarren. Sailkapeneko lehenaren eta azkenaren arteko neurketa izango da eta jokoan ezer ez dagoen arren, alegiarrek beste garaipen batekin agurtu nahiko dute ligaxka. Lehen itzulian 80 eta 51 irabazi zuten Elorrin.

Lehen postuan amaitzea ziurtatuta dute Elorri Aldapakoek. Iragan larunbatean 75 eta 41 irabazi zuten Modelos Modelberriren aurka eta azken neurketako emaitzari begira egon gabe, lidertza hori ziurtatuta dute. Larunbateko partidaren hasieran defentsan ez zuten gehiegi estutu nahi izan alegiarrek, faltekin ez kargatzeko. Esperientzia handiko jokalariz osaturiko talde bat zuten aurrean eta eustera mugatu ziren. Hala ere, ondo bideratu zuten neurketa, atsedenaldi luzera 35 eta 24 iritsiz. Hirugarren laurdenean defentsa gogortu eta kontraerasoan jokatzeko aukerak sortuz, 29 eta 8ko partziala egin zuten eta azken hamar minutuetan lasaiago jokatuz, 75 eta 41 amaitu zen partida.

Gauzak horrela, bigarren fasera basket averageak irabazita sailkatuko dira alegiarrak eta oraindik multzokideen berririk izan ez arren, egoera onean ekingo diote fase horri. Azken jardunaldiaren ostean, astebeteko atsedena izango dute eta otsaileko azken asteburuan hasiko da bigarren fasea.

Elorri Aldapak garaipenaren bidera itzulita hasi du 2024 urtea. Hernaniren aurkako partida izan zuten larunbatean Elorrin eta 75 eta 65 irabazi zuten. 2023ko azken partidan denboraldiko lehen porrota jaso zuen taldeak eta partida hartan gertatutakoak akuilu lana egin du taldean. Jokalariei min eman zien porrot hark eta gabonetako oporraldia hausnarketarako eta lanerako baliatu du Elorri Aldapak.

Porrot hartatik ondorio garbi bat atera zuten. Lanik gabe jai dagoela eta edonoren aurka galdu daitekeela. Bada, gauza txarrek ere badute bere alde ona eta urte berriko lehen partidari begira gauzak oso ondo prestatu zituzten. Egiari zor, lauzpabost bajarekin iritsi ziren Hernaniren aurkako partidara baina zeuden jokalariek maila oso ona eman zuten eta talde lan horrek ahalbidetu zuen neurri handi batean garaipena lortzea.

Hernaniarrak bolada on batean eta gogotsu iritsi ziren Alegiara. Hasierako minutuetan beraiek izan ziren erritmoa jartzen saiatu zirenak baina Elorri Aldapak pixkanaka lortu zuen partidan sartzea eta bere erritmoa ezartzea. Lehen laurdena 28 eta 18 amaitu zen eta atsedenaldi luzera errenta mantenduz iritsi ziren. Bigarren zatian gauzak antzeko mantendu ziren eta azkenerako, 75 eta 65 amaitu zen partida.

Elorri Aldapak lidertzan jarraitzen du 21 punturekin lehen fasea amaitzeko hiru jardunaldiren faltan. Asteburuan atsedena izango dute eta hurrengo partida urtarrilaren 27an jokatuko dute Zarautzen. Partida hori eta Elgoibarren aurka etxean jokatuko dituztenetan emaitza onak lortuta, igoera fasera oso egoera onean sailkatuko dira.

Elorri Aldapa saskibaloi taldeak garaipen berri bat lortu zuen larunbatean. Erroibide Irun taldearen aurka jokatu zuten alegiarrek eta 56 eta 28 irabazi zuten. Denboraldi osoan jokatu duten partidarik trabatuena izan zuten alegiarrek eta hori neurri handi batean, aurkariaren joko motak eragin zuen. Jokatzera baino, ez jokatzera gehiago jardun zuten irundarrek eta une askotan gogortasun gehiegirekin ere aritu ziren.

Dena den, Elorri Aldapak aurkitu zuen proposamen horri aurre egiteko modua eta puntu gutxira jokatu zen partida izan arren, hasieratik hartu zuten aurrea. Lehen laurdena 21 eta 10 amaitu zen eta atsedenaldi luzera 31 eta 11 iritsi ziren. Hirugarren laurdenak 40 eta 23 amaitu zen baina azken hamar minutuetan berriz ere gehiago izan ziren alegiarrak eta 56 eta 28 amaitu zen neurketa.

Elorri Aldapak lidertzan jarraitzen du jokaturiko bederatzi partidak irabazita. Asteburuan atsedena izango dute eta hilaren 16an itzuliko dira lehiara, sailkapeneko bigarrena den AZ Casa de la Riojaren aurka 20:00etan Donostian jokatzeko. Taldeak eskerrak eman nahi dizkie larunbateko partidara hurbildu ziren zaleei eta baita Balerdipeko Erleak etxeari ere, atsedenaldiko zozketarako produktu sorta bidaltzeagatik.

Lehengo lepotik burua Elorri Aldaparentzat bigarren itzuliaren hasieran. Astigarragako Mundarroren kantxan aritu ziren ostiralean eta 50 eta 89 irabazi zuten, zortzigarren garaipena erreskan lortuz. Lehen itzulian partida guztiak irabazi ostean, datozen partidetan aurkarien intentsitate maila berdintzea da Elorri Aldaparen helburua, garaipenak pilatzen jarraitzeko eta bide batez, taktikoki gauza berriak lantzen eta jokoan txertatzen ere joan nahi dute.

Ondo sartu ziren partidan alegiarrak. Hasieratik intentsitate handiarekin jokatu zuten eta joko azkarra eginez, berehala zabaldu zuten markagailuan tartea. Hori ikusita, aurkariak zonakako defentsaren aldeko hautua egin zuen eta horrek Elorri Aldapari gauzak zaildu arren, tarteari eustea lortu zuten jokalari guztien artean minutuak banatzen jarraitzen zuten bitartean. Atsedenaldi luzearen ostean, Elorri Aldaparen ezaugarri den defentsa gogorrean oinarritzen den jokoa ikusi ahal izan zen eta horrek baloiak lapurtzeko eta saskiratze errazak lortzeko aukera eman zion taldeari. Aipatzekoa da aldi berean, orain arte min hartuta egon den jokalari batek taldearekin debuta egin zuela, denboraldiko lehen minutuak jokatuz.

Bederatzigarren jardunaldiko partida jokatuko dute larunbatean 16:15ean Elorrin Erroibide Irunen aurka. Alegiarrek 16 puntu dituzte sailkapenean eta irundarrek bederatzi. Lehen itzulian Elorri Aldapak 31 eta 60 irabazi zuen eta horrenbestean, etxekoek beste garaipen bat lortzeko aukera polita izan dezakete.

Larunbatekoa 2023an etxean jokatuko duten azken partida izango da eta bide batez, gogorarazi nahi da etxeko partidetara atsedenaldiaren aurretik joaten diren zaleek, sari bat irabazteko aukera izango dutela partidara joate hutsagatik. Balerdipeko Erleakek eskainitako produktu sorta baten zozketa egingo da. Horrez gain, Hiruko Jokoa ere izango da eta beraz, zaleei taldea animatzera joateko deia luzatzen zaie.

Elorri Aldapak zazpi garaipen lortu ditu jokaturiko zazpi partidetan. Larunbatean lehen itzuliko azken neurketa izan zuten Eibar Saskibaloiaren aurka eta 80 eta 51 irabazi zuten. Tranpa modura definitu daitekeen partida zuten aurrean alegiarrek. Sailkapeneko azkenaren aurka jokatzen zuten baina baja batzuk ere bazituzten. Aurreko partidetan minutu gutxiago izan dituzten jokalariek jokatzeko aukera izan zuten eta taldeko arduradunak pozik agertu dira eman zuten mailarekin eta erantzukizuna hartu behar zen unean hartzeko izan zuten ausardiagatik.

Partida trabatua izan zen orokorrean. Aurkariak gabezia teknikoak defentsa gogor eta une batzuetan zikin samarrarekin estali nahi izan zituen eta lehen minutuetan kosta egin zitzaion Elorri Aldapari. Lehen laurdena 12nako berdinketarekin amaitu zen baina bigarrenean alegiarren gaitasun fisikoa nagusitu zen eta beraien ohiko jokoa eginez, markagailuan tartea zabaltzea lortu zuten. Erasoan aukera ezberdinak baliatu zituzten kanpotik zein barrutik jokatuz eta horrek zalantzak sortu zizkion aurkariari. Horren lekuko da lehen laurdenean 12 puntu soilik sartzea eta azken markagailua 80 eta 51koa izatea.

Giro polita izan zen Elorri pilotalekuan. Ohiko Hiruko Jokoaz gain, atsedenaldiaren aurretik partida ikustera joan zirenen artean, Larreta Esnekiak etxeak eskainitako produktu sorta baten zozketa egin zen. Datozen etxeko partidetan beste hainbat babesleren produktuen zozketak egingo dira eta horrenbestean, zaleei partidak ikustera joaten jarraitzeko deia egiten zaie. Bide batez, babesleen laguntza ere eskertu nahi du taldeak.

Ostiralean bigarren itzulia

Alegiarrek ostiralean ekingo diote bigarren itzuliari. Astigarragako Mundarroren kantxan ariko dira 19:45etik aurrera. Alegiarrak lehen postuan dira 14 punturekin eta Astigarragako taldea laugarrena da 10 punturekin. Lehen itzulian 89 eta 49 irabazi zuen Elorri Aldapak. Lehen itzulian lortutako zazpi garaipenei balioa emanez baina harrokeriarik gabe joango dira Elorri Aldapakoak Astigarragara, ahal den neurrian zortzigarrena lortzera.

Elorri Aldapak sei partida ofizial jokatu ditu aurtengo denboraldian eta guztiak irabazi ditu. Asteburuan Elgoibarko Modelos Modelberri taldearen kantxan jokatu zuten eta 57 eta 84 irabazi zuten. Partidari ondo ekin zion talde alegiarrak, serio eta talde modura jokatuz. Lehen minutu horietan kanpoko jaurtiketekin ere asmatu zuten eta horrek aurkaria defentsa zabaltzera behartu zuen. Modu horretan, Elorri Aldapak barrutik zein kanpotik jokatzeko aukera izan zuen, erasoan aukera ezberdinak baliatuz.

Modelos Modelberrik maila handiko bi jokalari ditu eta horiek mina egin zuten hainbat unetan. Dena den, Elorri Aldapak lortu zuen jokalari horien jarduna zaintzea eta markagailuko aldeari eustea. Lehen laurdena 11 eta 26 amaitu zen eta atsedenaldi luzera 28 eta 42 iritsi ziren.

Hirugarren laurdenean ezarri zuen Elorri Aldapak orain arte hain emaitza onak eman dizkion erritmo altua. Defentsako lana zorroztearekin batera, korrika egiteko aukera izan zuten eta modu horretan nabarmen zabaldu zuten markagailuko tartea. Eraginkortasun horrekin, aurkaria menpean izan zuten eta elgoibartarrek besoak jaitsi eta amore eman zuten une horretatik aurrera.

Azken minutuetara alde oso handiarekin iritsi zen Elorri Aldapa baina azken bost minutuetan emandako mailarekin ez dira oso pozik agertu taldeko arduradunak. Taldea guztiz erlaxatu zela adierazi dute eta gutxi behar izan zutela partidatik ateratzeko. Markagailuko aldeak behera egin zuen eta partida horretatik zerbait ikasi dutela esan dute. Egoera horiek kudeatzen ikasteak, horrelako akatsak ekiditea ekarriko du, ia irabazita dauden partidak arriskuan jarri gabe. Taldea erlaxatzen bada, edonork irabazi diezaioke.

Larunbatean 16:15ean zazpigarren jardunaldiko partida jokatuko du Elorri Aldapak etxean. Sailkapeneko azkena den Eibar Saskibaloia izango dute aurkari eta beste garaipen bat lortzeko aukera ona izan daiteke multzoko liderrarentzat. Gogoan izan, partidaren atsedenaldian Hiruko Jokoa egingo dela eta partida ikusten dagoen zaleren batek hiruko bat jaurti eta sariak irabazteko aukera izango duela. Horrez gain, atsedenaldi luzea baino lehen partida ikustera joaten diren guztien artean, Larreta esnekien produktu sorta baten zozketa egingo da.

Elorri Aldapak denboraldiko bosgarren garaipena lortu zuen larunbatean. ZAST Zarautzen aurkako liga partida izan zuten eta 81 eta 53 irabazi zuten. Multzoko talderik txukunenetako bat dela erakutsi zuen ZASTek lehen zatian. Elorri Aldapa estu hartu zuten hainbat unetan eta joko maila ona erakutsi zuten. Alegiarrei ohikoa baino gehixeago kosta zitzaien partidari neurria hartzea baina behin neurketaren irakurketa zuzena eginda, ohikoa duten intentsitatearekin jokatu zuten, lan asko eginez. Aipatzekoa da taldeak 5 baja zituela baina hala ere, 10 jokalarirekin lehiatzeko aukera izan zuten. Hori da aurtengo Elorri Aldaparen bertuteetako bat. Talde luzea dutela. Eta horri, jokalari guztien inplikazioa, ahalegina eta lehiatzeko grina erantsita, ematen ari diren maila ematea lortzen da. Taldeko arduradunek eskerrak eman nahi dizkiete jokalari guztiei, aurreko urteetatik daudenei eta berriei, inplikazio maila horrengatik eta sortu duten talde giro onagatik.

Aipatu bezala, lehen minutuetan ohikoa baino gehiago kosta zitzaien alegiarrei beraien erritmoa ezartzea. Aurkariaren maila, epaileen irizpideak, jaurtiketa libreetako akatsak… Hainbat izan ziren hori eragin zuten faktoreak baina hala ere, une oro aurretik izan ziren markagailuan eta atsedenaldi luzera 36 eta 24 aurretik iritsi ziren.

Hirugarren laurdenean lortu zuten aurkariak baino martxa bat gehiago sartzea eta talde osoaren lan nekaezinari esker, defentsan baloiak lapurtu eta kontraerasora azkar ateratzeko aukera izan zuten. Horri, jokalari batzuk hiruko marratik izan zuten zorroztasuna gehituta, markagailuan aldea zabaldu zuten, azkenerako 81 eta 53 irabaziz.

Aipatzekoa da aldi berean, harmailetan sortu zen giroa. Ohiko ikusleekin batera, Elorri Aldapako jokalari lazkaotar baten kuadrillakoek etengabe animatu zuten taldea eta hori da zuzendaritzako kideek etxeko partidetan nahi duten giroa.

Igandean jokatuko dute seigarren jardunaldiari dagokion partida 13:00etan
Elgoibarren. Modelos Modelberri izango dute aurkari. Elgoibartarrak laugarrenak dira
sailkapenean, hiru garaipenekin.

Lau jardunalditan lau garaipen. Hori da Elorri Aldaparen denboraldi hasiera honetako balantzea. Alegiarrek Hernanin jokatu zuten eta 50 eta 65 irabazi zuten. Orain arteko partidarik gogorrena izan zen larunbatekoa. Aurrean talde gaztea, azkarra eta intentsitate handian jokatzen duena topatu zuten alegiarrek. Dena den, Elorri Aldapa ondo sartu zen partidan eta lehen laurdenaren amaieran bost puntu aurretik ziren, 6 eta 11. Bigarrenean, talde lan on batean oinarrituta, tarte hori zabaltzea lortu zuten eta atsedenaldi luzera 14 eta 28 iritsi ziren. Hernaniarrek joko gogorra egin zuten eta partida nahasten saiatu ziren. Uneren batean Elorri Aldapako jokalariak joko horretan murgildu ziren baina burua hotz mantentzea lortu zuten. Talde lanean oinarrituriko hiruzpalau minutu onekin, etxekoen ahalegin guztiak bertan behera uztea lortzen zuten.

Hirugarren eta laugarren laurdenetan aldeari eustera eta jokalari guztien artean minutuak banatzera mugatu ziren alegiarrak. Aurkariaren joaldiak ondo kontrolatu zituzten eta azkenerako 50 eta 65 irabazi zuten. Hori bai, larunbatekoak balio izan die talde lanik egiten ez bada, partidak irabaztea zaila dela jabetzeko. Jaurtiketa erraz ugari huts egin zituzten alegiarrek eta gabezia hori talde lanarekin estali zuten. Taldeko arduradunek esan duten moduan, ondo etorriko zaie larunbateko partida, datozen jardunaldiei begira.

Hain zuzen ere, larunbatean 16:15ean ZAST Zarautzen aurka jokatuko dute etxean. Alegiarrak sailkapeneko lehen postuan dira lau partidak irabazita eta zarauztarrak hirugarrenak dira, hiru garaipenekin. Talde historikoa da aurkaria eta Elorri Aldapak dei egiten die zaleei, taldea animatzera hurbildu daitezen, bosgarren garaipena lortzeko ezinbestekoa izango baita zaleen babesa.

Elorri Aldapak jokatzen duen guztia irabazten jarraitzen du. Larunbatean AZ Casa de la Riojaren aurkako partida izan zuten eta 74 eta 43 irabazi zuten. Alegiarrekin batera, jokaturiko bi partidak irabazita ziren donostiarrak eta partida gogorra aurreikusten zen Elorrin. Etxekoak ondo sartu ziren partidan eta ohikoa duten erritmoa ezarri nahi izan zuten hasieratik. Lehen laurdena 20 eta 15 amaitu zen eta bigarrenean, defentsako intentsitatea pixka bat igota, tarte polita zabaldu zuten, atsedenaldi luzera 44 eta 31 iritsiz. Hirugarren laurdenean 20 eta 6ko partzialarekin nagusi zirela berretsi zuten eta azken hamar minutuak jada lehia erabakita zegoela jokatu ziren. Beti ikusten du taldeak zer hobetua eta bere erritmora jokatzen ikastea da orain erronka, aurkariaren erritmora moldatzen ibili beharrik gabe. Azkar jokatzea eta aldi berean modu ordenatuan aritzea, beste modu batera esanda.

Taldeak zaleen babesa eskertu nahi du eta hemendik aurrerako partidetan ere Elorrira hurbiltzen jarraitzera animatu nahi ditu.

Alegiarrek sailkapeneko lehen postuan jarraitzen dute sei punturekin eta asteburuan atsedena izango dute. Hurrengo partida urriaren 28an, larunbata, jokatuko dute zazpigarren postuan lau punturekin dagoen Hernaniren kantxan 16:00etan. Garaipen bat eta bi porrot pilatu dituzte hernaniarrek lehen hiru partidetan.